Posted by 
Azərbaycanda arxeoloji abidələrin atlası yaradılacaq
AMEA Arxeologiya və Etnoqrafiya İnstitutunda Azərbaycan ərazisində tədqiq olunmuş və gələcəkdə olunacaq arxeoloji abidələrin informasiya-kommunikasiya texnologiyaları vasitəsilə qeydə alınmasına başlanılacaq. SİA-nın xəbərinə görə, institutda bu işlə, bilavasitə “Arxeologiyada informasiya texnologiyalarının tətbiqi” sektoru məşğul olacaq. Sektor arxeoloji abidələrin inventarlaşdırılması, sərhədlərinin müəyyən edilməsi, pasportlaşdırılması və xəritələrin hazırlanması işini həyata keçirəcək.
Qeyd edək ki, arxeoloji tədqiqatlarda aparılan bu işlər zamanı ilk dəfə Coğrafi İnformasiya Sistemindən istifadə ediləcək. Azərbaycanın arxeoloji abidələrinin elektron xəritəsinin və maddi-mədəni nümunələrinin pasportunun yaradılması respublika ərazisindəki arxeoloji abidələrin müasir üsullarla mühafizəsi işinin, xüsusilə də onların elmi araşdırılmasının təkmilləşdirilməsinə xidmət edəcək. Arxeoloji abidələrin atlasının yaradılması AR Prezidenti cənab İlham Əliyevin 2013-cü il 27 dekabr tarixli “Daşınmaz tarix və mədəniyyət abidələrinin bərpası, qorunması, tarix və mədəniyyət qoruqlarının fəaliyyətinin təkmilləşdirilməsi və inkişafına dair 2014-2020-ci illər üzrə Dövlət Proqramı” na dair Sərəncamına əsasən həyata keçiriləcək.
Sia.az
