Posted by 
Təhsil Nazirliyi orta məktəblərlə bağlı 41 şikayəti araşdırır
Bu ilin aprel ayında Təhsil Nazirliyinə orta məktəblərlə bağlı 41 şikayət daxil olub ki, onların da 28-i Bakı şəhərindəki məktəblərlə bağlı olub.
Trend nazirliyin rəsmi saytina istinadən məlumat verir ki, Təhsil Nazirliyinin Telefon Məlumat Mərkəzinə (“Qaynar xətt” xidməti, telefon: 146) 3961 zəng (2013-cü ilin müvafiq dövrü ilə müqayisədə 5 dəfə çox), Kommutator Xidmətinə isə 5600-ə yaxın zəng daxil olub. Vətəndaşların Qəbulu Mərkəzində isə 5023 vətəndaşa xidmət göstərilib.
Telefon Məlumat Mərkəzinə və Vətəndaşların Qəbulu Mərkəzinə daxil olmuş 8984 müraciətin 6220-si (müraciətlərin əksəriyyəti sorğu xarakterli olub) dərhal cavablandırılıb və operativ həll edilib. Vətəndaşların Qəbulu Mərkəzində 1678 vətəndaşdan ərizə (661 ədəd), məktub (794 ədəd) və digər sənədlər (223 ədəd) qəbul olunub. 1035 vətəndaş sorğularına uyğun olaraq, elektron qaydada Təhsil Nazirliyinin müvafiq məsul şəxslərinin qəbuluna yazılıb. Vətəndaşların şikayət xarakterli 51 müraciəti isə xüsusi proqram vasitəsilə qeydiyyata alınaraq araşdırılması üçün nazirliyin müvafiq struktur bölmələrinə yönləndirilib. Onlardan 41-i ümumtəhsil məktəblərinin (Bakı şəhərindəki məktəblərin fəaliyyəti ilə əlaqədar 28 müraciət daxil olub) fəaliyyətinə aid olan müxtəlif məsələlərlə bağlıdır.
Daxil olan müraciətlərdə daha çox təhsil sənədlərinin alınması, diplomların tanınması üçün tələb olunan sənədlərin siyahısı, ali təhsil və ümumi təhsillə bağlı məsələlər əksini tapıb.
Trend/az
