Posted by 
Azərbaycanda 200-dən çox tələbə və məzuna boş iş yerlərinə göndəriş verilib
Əmək və Əhalinin Sosial Müdafiəsi Nazirliyi yanında Dövlət Məşğulluq Xidməti tərəfindən bu günlərdə “Odlar Yurdu” Universitetində “Karyerada ilk addım” devizi altında keçirilən aktiv məşğulluq tədbirində 216 nəfər tələbə və məzuna boş iş yerlərinə göndəriş verilib.
Nazirliyin İctimaiyyətlə əlaqələr şöbəsindən Trend-ə verilən məlumata görə, bununla yanaşı, tədbir zamanı müasir tələblərə cavab verən ixtisaslı kadrların seçiminin aparılması məqsədilə işəgötürənlər tərəfindən 515 nəfər tələbə və məzundan şəxsi məlumatlar (CV) qəbul olunub.
Xatırladaq ki, yuxarı kurs tələbələri və məzunların əmək bazarına inteqrasiyasına kömək məqsədilə təşkil olunan tədbir zamanı 9-u dövlət, 77-si isə özəl sektora aid ümumilikdə 86 müəssisə və təşkilat tərəfindən 855 boş (vakant) iş yeri tələbə və məzunların seçiminə təqdim edilmişdi.
İl ərzində tələbə və məzunların əmək bazarına inteqrasiyası məqsədilə digər univeristetlərdə də aktiv məşğulluq tədbirinin həyata keçirilməsi nəzərdə tutulur.
Trend.az
