Posted by 
Yozef Blatterə Bakı Olimpiya Stadionu barədə məlumat verilib
Bu gün Rusiyanın Sankt-Peterburq şəhərində FIFA-nın prezidenti Yozef Blatterlə AFFA-nın prezidenti Rövnəq Abdullayev arasında görüş keçirilib.
Trend AFFA-nın saytına istinadən məlumat verir ki, görüşdə 2014-cü il ərzində Azərbaycanda futbolun inkişafı məqsədilə həyata keçirilmiş tədbirlər, inşası başa çatmaqda olan Bakı Olimpiya Stadionunun hazırkı vəziyyəti barədə ətraflı məlumat verilib, stadionun tikinti prosesini əks etdirən videoçarx nümayiş olunub. FIFA prezidenti AFFA rəhbərliyinin məlumatını dinlədikdən sonra görülən işlərdən məmnunluğunu bildirib.
Görüşdə FIFA-nın Kommunikasiya və İctimaiyyətlə Əlaqələr direktorunun müavini Nikolas Meynqot, FIFA-nın Avropada futbolun inkişafı üzrə Proqramının meneceri Yeva Paskue, FIFA prezidentinin assistentləri Edvard Braun və Qay-Filipp Matye, AFFA-nın baş katibi Elxan Məmmədov iştirak ediblər.
Xatırladaq ki, Bakı Olimpiya Stadionunun 2011-ci il iyunun 6-da keçirilmiş təməlqoyma mərasimində Azərbaycan Prezidenti İlham Əliyev, FIFA-nın prezidenti Y.Blatter, UEFA-nın prezidenti Mişel Platini və AFFA-nın prezidenti R.Abdullayev iştirak etmişdi.
Trend.az
