Posted by 
Yeni qeydiyyatdan keçmiş dini icmalara şəhadətnamələr təqdim olunub
Azərbaycanda yeni qeydiyyatdan keçmiş dini icmalara şəhadətnamələr təqdim olunub.
Dini Qurumlarla İş üzrə Dövlət Komitəsinin (DQİDK) mətbuat xidmətindən Trend-ə verilən məlumata görə, mayın 12-də Dövlət Komitəsində qeydiyyatdan keçmiş bir qrup dini icmaya şəhadətnamələr təqdim edilib.
Bu məqsədlə təşkil edilmiş toplantıda Dövlət Komitəsinin rəhbərliyi, şöbə müdirləri və yeni qeydiyyatdan keçmiş dini icmaların sədrləri iştirak ediblər.
DQİDK sədri Mübariz Qurbanlı Azərbaycanda dövlət-din münasibətlərindən danışaraq bildirib ki, ölkədə dini durum sabitdir və dövlət-din münasibətləri qanunla tənzimlənir. Mövcud qanunvericilik dövlət-din münasibətlərini yüksək səviyyədə nizamlayır. Ölkəmizdə müxtəlif dini konfessiyaların mövcud olduğunu vurğulayan Komitə sədri Azərbaycanda məscidlərlə yanaşı, kilsə və sinaqoqların da fəaliyyət göstərdiyini diqqətə çatdırıb.
Azərbaycan dövlətinin dini icmalara qayğısından danışan Komitə sədri qeyd edib ki, ulu öndər Heydər Əliyevin başladığı bu siyasət hazırda Azərbaycan Prezidenti cənab İlham Əliyev tərəfindən uğurla davam etdirilir: “Dini icmaların maarifləndirmə işinin təşkili və icmaların fəaliyyətinin yaxşılaşdırılması məqsədilə ölkə Prezidenti tərəfindən ayrılmış maliyyə yardımı bunun əyani göstəricisidir. Maliyyə yardımı İslam və qeyri-islam dini icmalar üçün nəzərdə tutulub”.
Yeni qeydiyyatdan keçmiş dini icmaların sədrlərinə müvafiq tövsiyələr verən M.Qurbanlı onların yerlərdə axund və imamlarla, eləcə də QMİ-nin nümayəndələri ilə qarşılıqlı əməkdaşlıq və fəaliyyətinin zəruriliyini vurğulayıb.
Eyni zamanda, M.Qurbanlı dini icma sədrlərinə rəhbərlik etdikləri icmaların milli-mənəvi dəyərlərimizin təbliği və radikalizmə qarşı mübarizə istiqamətində fəaliyyət göstərmələrini, ümummlilli maraqlardan çıxış etmələrini tövsiyə edib.
Dini icma sədrləri çıxış edərək dini sahəyə göstərdiyi diqqət və qayğıya görə Prezident İlham Əliyevə təşəkkürlərini bildiriblər.
Sonda qeydiyyatla bağlı şəhadətnamələr dini icma sədrlərinə təqdim olunub.
Trend.az
