Posted by 
Türkdilli Ölkələrin və Toplumların V Media Forumu Əli bəy Hüseynzadəyə həsr olunacaq
Şimali Kipr Türk Respublikasında (ŞKTR) keçirilən Türkdilli Ölkələrin və Toplumların IV Media Forumu başa çatıb.
Mətbuat Şurasından (MŞ) Trend-ə verilən məlumata görə, noyabrın 15-dən 17-dək davam edən tədbirdə Azərbaycan Mətbuat Şurasının sədri Əflatun Amaşovun rəhbərlik etdiyi nümayəndə heyəti təmsil olunub. Ə.Amaşovla yanaşı, Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru Vüqar Səfərlinin, Milli Televiziya və Radio Şurasının sədri Nuşirəvan Məhərrəmlinin, “Yeni Azərbaycan” qəzetinin baş redaktoru Hikmət Babaoğlunun, MŞ İdarə Heyətinin üzvü, “Bakı xəbər” qəzetinin baş redaktoru Aydın Quliyevin, “Xalq cəbhəsi” qəzetinin baş redaktoru Elçin Mirzəbəylinin, Azərbaycan Jurnalist Qadınlar Assosiasiyasının rəhbəri Sevil Yusifovanın, “Zaqatala” qəzetinin baş redaktoru İbrahim İbrahimovun daxil olduğu nümayəndə heyəti öncə ŞKTR-in yaranmasının 31-ci ildönümü ilə bağlı bayram tədbirində də iştirak edib.
Forumun açılışında Şimali Kipr Türk Respublikasının Prezidenti Dərviş Əroğlu, Türkiyənin Mətbuat və İnformasiya Baş İdarəsinin rəhbəri Murat Karakaya, Türkiyə Baş nazirinin müavini Bülənt Arınc, Türkiyə Böyük Millət Məclisinin sədri Cəmil Çiçək çıxış edərək türkdilli ölkə və toplumların bir-biriləri ilə qarşılıqlı münasibətlərinin gücləndirilməsində medianın daşıdığı önəmi vurğulayıb, Türkdilli Ölkələrin və Toplumların Media Birliyinin əhəmiyyətindən söz açıblar.
“Türkdilli ölkələrin və toplumların aktual problemlərinin həllində medianın rolu” mövzusunda keçirilən IV Forum 4 iclasdan ibarət olub. Birinci iclasda türkdilli ölkələrin və toplumların aktual problemlərinə medianın yanaşması məsələləri ətrafında məruzələr edilib, müzakirələr aparılıb. Bu baxımdan beynəlxalq konfliktlərin mediada yer almasına, Kipr böhranı və media, Ukraynada yaşanan proseslərdə Krım türklərinin mövqeyinin kütləvi informasiya vasitələrində işıqlandırılmasına, habelə Dağlıq Qarabağ münaqişəsi ilə bağlı həqiqətlərin türkdilli mediada təbliği reallıqları ətrafında diskussiyalara geniş yer verilib.
Ə.Amaşov türkdilli ölkələrin və toplumların problemlərinin həllinə medianın nə kimi kömək göstərməsi ilə bağlı çıxış edib. Bu mövzuda iclasa sədrlik edən Şura sədri ötən üç il müddətində Türkdilli Ölkələrin və Toplumların Media Birliyinin gördüyü işlərdən söz açıb. O, çıxışında texnoloji yeniliklərin formalaşdırdığı yeni medianın ortaq dəyərlərin təbliğindəki rolu üzərində dayanıb: “İndiki Avropa İttifaqı bir model kimi hazırda quruma üzv olan dövlətlərin siyasətində uzunmüddətli hədəf halına gəlməzdən öncə düşüncələrdə təşəkkül tapmış, çeşidli kitablar vasitəsilə cəmiyyətə yeridilmişdi. Türk birliyi məsələsi isə məhz vahid konsepsiyasızlıqdan zaman-zaman ideoloji fazaya qədəm qoya bilməmiş, nəticə etibarilə türklərin toplum olaraq dünya düzəninə təsiri aktuallaşmamışdı. Hesab edirəm ki, keçirdiyimiz bu forumlar dünyaya türk birliyi mesajının verilməsi baxımından önəmlidir və bu işdə hazırda onlayn medianın imkanlarından yararlanmaq vacibdir”.
Forumun üçüncü iclasında iştirakçılar türk dünyasının görkəmli şəxsiyyəti İsmayıl bəy Qaspıralının ortaq türk dəyərlərinin təbliği ilə bağlı fəaliyyətindən söz açıblar. Bu iclasda, həmçinin türkdilli ölkələrin hökumət və dövlət səviyyəsindəki əlaqələrinin gücləndirilməsində medianın daşıdığı missiyaya diqqət yetirilib, bir sıra konkret məqamlara toxunulub.
Forumun dördüncü iclasında türkdilli media orqanlarının peşəkarlığı məsələləri müzakirə olunub. Mövcud xüsusda əməkdaşlığın dərinləşdirilməsinin vacibliyi önəm çəkilib.
Toplantıda, həmçinin “Yeni Azərbaycan” qəzetinin baş redaktoru Hikmət Babaoğlu məruzə edib. O, qlobal siyasi proseslərdə türk dünyasının yeri və roluna toxunaraq türkdilli ölkə və toplumlara məxsus media orqanlarının qlobal rəqabət müstəvisindəki daşıdığı funksiyanın müxtəlif aspektlərini şərh edib, bir sıra nümunələr üzərində dayanıb.
Qeyd edək ki, Türkdilli Ölkələrin və Toplumların IV Media Forumunda türkdilli ölkələrin və toplumların yaşadıqları 21 ölkədən 250-yə yaxın media nümayəndəsi iştirak edib. Toplantıda qarşıdakı forumların türk dünyasının önəmli şəxsiyyətlərindən birinə həsr olunması qərara alınıb. Bu baxımdan V forumun Əli bəy Hüseynzadəyə həsr olunması məqsədəuyğun sayılıb. Toplantıda, həmçinin Türkdilli Ölkələrin və Toplumların Media Birliyinin türk xalqlarının ortaq problemləri ilə əlaqədar dünyanın media ictimaiyyətinə müraciət ünvanlaması barədə razılığa gəlinib. Mövcud xüsusda Dağlıq Qarabağ münaqişəsinin, habelə İraqda və digər bölgələrdə türk xalqlarının üzləşdikləri durumun daha effektiv şəkildə beynəlxalq aləmə çatdırılmasının zəruriliyi vurğulanıb.
Trend.az
