Posted by 
Azərbaycan BMT-nin Avropa üzrə İqtisadi Komissiyasının 66-cı sessiyasında iştirak edir
Bu gün BMT-nin Avropa üzrə İqtisadi Komissiyasının 66-cı sessiyası çərçivəsində Azərbaycan xarici işlər nazirinin müavini Mahmud Məmməd-Quliyev və Azərbaycanın BMT-nin Cenevrə şəhərindəki bölməsi və digər beynəlxalq təşkilatlar yanında daimi nümayəndəsi, səfir Murad Nəcəfbəyli BMT-nin Cenevrə bölməsinin baş direktoru Maykl Moller ilə görüşüb.
Azərbaycanın BMT-nin Cenevrə şəhərindəki bölməsi və digər beynəlxalq təşkilatlar yanında Daimi Nümayəndəliyindən Trend-ə verilən məlumata görə, görüş zamanı Azərbaycan və BMT arasındakı münasibətlər müzakirə edilib və Azərbaycanın Cenevrədəki aktiv fəaliyyəti müsbət qiymətləndirilib.
Görüşdə bir sıra digər məsələlərlə yanaşı, BMT-nin 2015-ci ildən sonrakı İnkişaf Gündəliyi və İqlim Dəyişikliyi üzrə növbəti Zirvə toplantısı fonunda iqtisadi, ətraf mühit, nəqliyyat və enerji məsələləri ətrafında fikir mübadiləsi aparılıb.
Hazırda xarici işlər nazirinin müavini M.Məmməd-Quliyevin rəhbərlik etdiyi Azərbaycan nümayəndə heyəti BMT-nin Avropa üzrə İqtisadi Komissiyasının 66-cı sessiyasında iştirak edir. Xarici işlər nazirinin müavini yüksək səviyyəli panel çərçivəsində BMT-nin Avropa üzrə İqtisadi Komissiyasının rolu və Azərbaycanın regiona töhfələri mövzusunda çıxış edib.
Trend.az
