Posted by 
Amerikalı həmsədr: Yerevanda Dağlıq Qarabağ münaqişəsinin sülh yolu ilə həlli üzrə müsbət danışıqlar keçirilib
Yerevanda Dağlıq Qarabağ münaqişəsinin sülh yolu ilə həlli üzrə Ermənistan Prezidenti ilə müsbət danışıqlar keçirilib. Trend-in məlumatına görə, bu barədə ATƏT-in Minsk qrupunun ABŞ-dan olan həmsədri Ceyms Uorlik öz Twitter səhifəsində bildirib.
C.Uorlik deyib: “Prezidentlərin növbəti görüşünün tarixi hələ ki məlum deyil. Lakin Ermənistan Prezidenti Dağlıq Qarabağ münaqişəsinin sülh yolu ilə həlli istiqamətində dialoqun davam etdirilməsini vurğulayıb”.
ATƏT-in Minsk qrupunun həmsədrləri Ceyms Uorlik (ABŞ), İqor Popov (Rusiya) və Jak For (Fransa) 4-6 fevral tarixində regionda səfərdə olublar.
Həmsədrlər öncə Bakıda, sonra isə Yerevanda Dağlıq Qarabağ münaqişəsinin sülh yolu ilə həlli üzrə danışıqlar aparıblar.
Qeyd edək ki, yanvarın ortalarından başlayaraq cəbhə xəttində vəziyyət gərginləşib. Erməni Silahlı Qüvvələri intensiv şəkildə atəşkəs rejimini pozub. O dövrdən bu vaxta qədər atəşkəs rejimi 2000 dəfədən çox pozulub. Azərbaycan Müdafiə Nazirliyinin məlumatına görə, erməni diversiya qrupunun təmas xəttini keçmək cəhdinin qarşısı alınarkən Milli Ordumuzun iki zabiti şəhid olub, qarşı tərəf isə onlarla itki verib.
Tovuzun Əlibəyli kəndi istiqmətində isə erməni silahlı qüvvələrinin bir hərbi maşını zərərsizləşdirilib. Əlibəyli kəndinə keçməyə cəhd edərkən isə erməni diversiya qrupunun bir bələdçisi saxlanılıb.
Trend.az
