Posted by 
İdris İsayev: Azərbaycanda əmək müqaviləsi bildirişləri üzrə elektron informasiya sistemi iyulun 1-dən tətbiq olunacaq
Mayın 22-də əmək və əhalinin sosial müdafiəsi nazirinin müavini İdris İsayev Azərbaycanda Amerika Ticarət Palatasının (“AmCham”) Bakıda təşkil etdiyi aylıq işgüzar naharda iştirak edib.
Əmək və Əhalinin Sosial Müdafiəsi Nazirliyinin İctimaiyyətlə əlaqələr şöbəsindən Trend-ə verilən məlumata görə, tədbirin açılış mərasimində çıxış edən “AmCham”ın icraçı direktoru Nərgiz Nəsrullayeva-Müdüroğlu qonaqları və İ.İsayevı salamlayıb və “AmCham”la Əmək və Əhalinin Sosial Müdafiəsi Nazirliyi arasında əməkdaşlığa görə nazirlik rəsmisinə minnətdarlığını bildirib: “Əmək və Əhalinin Sosial Müdafiəsi Nazirliyi ilə daimi əməkdaşlığımız Palatanın üzvlərinin işgüzar imkanlarını artırır və nazirliyə biznes mühiti ilə daha yaxın olmaq imkanını yaradır”.
Əmək və əhalinin sosial müdafiəsi nazirinin müavini İ.İsayev Azərbaycan Prezidenti cənab İlham Əliyevin ölkədə əmək hüquqları sisteminin inkişafına, işçi hüquqlarının təminatına diqqət və qayğısının bu sahədə islahat tədbirlərinin aparılmasında mühüm əsas olduğunu vurğulayıb. Nazir müavini “Azərbaycan Respublikasının Əmək Məcəlləsində dəyişikliklər edilməsi haqqında” 2013-cü il 27 dekabr tarixli Azərbaycan Respublikasının Qanununun tətbiqi barədə Azərbaycan Respublikası Prezidentinin 2014-cü il 3 fevral tarixli fərmanına əsasən, əmək müqaviləsi bildirişlərinin elektron hökumət portalı üzərindən elektron informasiya sisteminə (EİS) daxil edilərək qeydiyyata alınması mexanizminin hazırlandığını bildirib. Əmək müqaviləsi bildirişlərinin elektron şəkildə qeydiyyata alınması üçün elektron informasiya sistemi cari il iyulun 1-dən tətbiq olunacaq: “EİS-in proqram təminatı artıq hazırdır və yaxın aylarda sistemin tətbiqinə başlanacaq. Bu mexanizm əmək bazarında mövcud münasibətlər sisteminin elektron qaydada hüquqi müstəvidə əhatə olunmasına imkan yaratmaqla, həm işçilərin, həm də biznes strukturlarının əmək bazarında mənafelərini ifadə edəcək”.
EİS-dən istifadə ilə bağlı müvafiq məlumatlandırma işlərin aparıldığını diqqətə çatdıran İ.İsayev eyni zamanda əməyin təhlükəsizliyi və sağlamlaşdırılması üzrə hazırlanan Milli Strategiya layihəsindən bəhs edib, layihəyə əsasən ölkədə Dövlət Əməyin Mühafizəsi Fondunun, Əməyin Mühafizəsi üzrə Milli İnformasiya Mərkəzinin, əməyin mühafizəsi vasitələrini istehsal edən müəssisələrin yaradılacağını bildirib.
Aparılan islahatlarda sosial tərəfdaşlarla, o cümlədən işəgötürənlərlə əməkdaşlığa mühüm önəm verildiyini qeyd edən İ.İsayev ayrı-ayrı iri şirkətlərlə əməkdaşlığa dair memorandumların, peşə əmək qabiliyyətinin itirilməsi hallarından icbari sığortanın təmin edilməsi üçün 3 iri sığorta şirkəti ilə sazişlərin imzalandığını bildirib. Nazirliklə “AmCham” arasında səmərəli əməkdaşlığın olduğunu vurğulayan nazir müavini qeyd edib ki, həm xarici, həm də yerli şirkətlərlə sosial tərəfdaşlıq çərçivəsində əməkdaşlıq mühiti əmək bazarının inkişafı, əmək münasibətlərinin təkmilləşdirilməsi tədbirlərinin təşkili zamanı sahibkarların da rəy və təkliflərinin öyrənilməsinə və nəzərə alınmasına imkan verir: “Çünki bu sahədə atılan addımlar əmək bazarındakı tərəflərin ümumi maraqlarına xidmət edir”.
Sonda İ.İsayev tədbir iştirakçılarının suallarını cavablandırıb.
Qeyd edək ki, Azərbaycanda Amerika Ticarət Palatası (“AmCham”) Azərbaycanın biznes maraqlarını dəstəkləyən və təşviq edən aparıcı biznes assosiasiyasıdır. Ölkənin ən geniş və nüfuzlu təşkilatlarından biri olaraq, “AmCham” öz üzvlərinə ən geniş işgüzar danışıqlar imkanı yaradır. 1996-cı ildə yaradılmış “AmCham” 280-dən çox üzvdən və Azərbaycan iqtisadiyyatının hər bir sektorunda fəal olan tərəfdaşlardan ibarətdir. “AmCham” Azərbaycanda xarici investisiyaların 80%-ni, eləcə də yerli investisiyalarının əhəmiyyətli hissəsini təmsil edir. Təşkilatın sahə komitələrinin vasitəsilə “AmCham”ın üzvləri qarşılıqlı məlumat mübadiləsi aparır, ümumi maraq doğuran məsələləri qaldırır və mümkün həllər təklif edir. “AmCham” üzvü olaraq, şirkətlər və təşkilatlar hökümətlə geniş əlaqə imkanları əldə edir.
Trend.az
