Posted by 
Azərbaycanda IX siniflər üçün dərsliklərin hazırlanması üzrə tender vaxtından əvvəl elan ediləcək
Azərbaycanın ümumi təhsil məktəblərinin IX sinifləri üçün dərsliklərin hazırlanması üzrə tender bir il əvvəldən elan ediləcək. Təhsil Nazirliyindən Trend-ə verilən məlumata görə, həmin dərsliklər 2016-2017-ci dərs ilindən istifadəyə veriləcək. Növbəti tədris ili üzrə IV sinif dərslikləri əsaslı şəkildə təkmilləşdirilərək çap olunacaq.
Növbəti dərs ili üçün VIII sinif dərsliklərinin hazırlanması üzrə tender bir il əvvəl elan edilib. Tender proseduru üzrə təqdim edilən və qalib gələn dərsliklər məhdud sayda çap edilərək 2015-ci ilin yanvar-may aylarında pilot məktəblərdə sınaqdan keçiriləcək. İrad və təkliflər nəzərə alındıqdan sonra çap edilib növbəti dərs ilinin başlanmasından xeyli əvvəl məktəblərə paylanacaq.
2014-cü ildə il ilk dəfə olaraq, Azərbaycanda maksimum adda və sayda – 271 adda 7,8 milyon ədəd dərslik çap olunub. Bəzi siniflər üçün tam yeni, qalanları üçün təkrar nəşr olan bu kitablar vaxtında bütün məktəblərə çatdırılıb.
Dərsliklərin satış məqsədilə çap edilməsindən əldə edilən gəlirin istifadəsi məsələlərinin tənzimlənməsi barədə müvafiq qərara əsasən, dərsliklərin əlavə nəşrindən Təhsil Nazirliyinin hesabına daxil olan vəsaitin 50 faizinin dərslik müəlliflərinə ödənilməsi nəzərdə tutulub.
Trend.az
