Posted by 
ABŞ-ın müvəqqəti işlər vəkili: Azərbaycanın dini tolerantlığın inkişafında və ekstremizmin qarşısının alınmasında nəzərəçarpan nailiyyətləri var
Azərbaycanın dini tolerantlığın inkişafında və ekstremizmin qarşısının alınmasında nəzərəçarpan nailiyyətləri var və bu, terrorçuluğun yayılmasının qarşısının alınmasında ən yaxşı yoldur. Trend-in ABŞ-ın Azərbaycandakı səfirliyinin rəsmi Facebook səhifəsinə istinadən verdiyi məlumata görə, bunu səfirliyin müvəqqəti işlər vəkili Derek Hoqan səfirliyin sosial şəbəkədəki rəsmi səhifəsində terrorçuluğa qarşı mübarizəyə dair müzakirələrdə qeyd edib.
D.Hoqanın sözlərinə görə, terrorçuluq hər bir kəsə təhlükə yaradır: “Bu səylərə dəstək verməyin yollarından biri Azərbaycan hökuməti ilə birgə işləyərək terrorçuluğun maliyyələşdirilməsi və çirkli pulların yuyulmasına qarşı mübarizə sahəsində işləyən peşəkarlar üçün təlim və tədris imkanları yaratmaqdır. Bu, terrorçuluğun maliyyələşdirilməsinin qarşısını alır. Azərbaycan həmçinin ABŞ-ın Milli Müdafiə Aktının 1206-cı bölümü çərçivəsində hərbi sursat və təlimlərdən yararlanır”.
Müvəqqəti işlər vəkili qeyd edib ki, bu kimi yardım Azərbaycana dəniz qüvvələrini inkişaf etdirmək və antiterror əməliyyatları keçirməyə kömək edir: “Bir neçə proqram çərçivəsində dəniz qüvvələrinin inkişafı və antiterror əməliyyatlarının keçirilməsi sahəsində təlim və fəaliyyətlərə 13 milyon ABŞ dolları ayrılıb”.
D.Hoqan bildirib: “ABŞ Prezidenti Barak Obama və dövlət katibi Con Kerri dəfələrlə qeyd ediblər ki, terrorçuluğa qarşı mübarizədə hər bir dövlət rol oynaya bilər və mən düşünürəm ki, verilən hər bir töhfə vacibdir”.
Onun sözlərinə görə, Azərbaycan dünyəvi müsəlman dövləti və ekstremizmə qarşı olan bir ölkə kimi nümunə ola bilər: “Azərbaycan NATO koalisiyasının əsgərləri və Beynəlxalq Təhlükəsizlik Yardımı Qüvvələri (İSAF) ilə çiyin-çiyinə olmaqla terrorçuluğa qarşı mübarizəyə olan öhdəliyini nümayiş etdirib. Azərbaycan, həmçinin lazımi avadanlığın və təchizatın tranzitini həyata keçirməklə ABŞ-ın və NATO-un terrorçuluğa qarşı səylərinə dəstək verir. Artıq qeyd etdiyim kimi, Azərbaycan bizimlə, həmçinin terrorçuluğun maliyyələşdirilməsinə qarşı mübarizə sahəsində də əməkdaşlıq edir. Biz Azərbaycana terrorçuluğa qarşı mübarizədə verdiyi dəstəyə görə minnətdarıq”.
Hər il sentyabrın 11-də 2001-ci ildə Birləşmiş Ştatlarda baş verən terror hücumlarının ildönümü qeyd olunur. Bununla əlaqədar ABŞ-ın Azərbaycandakı səfirliyinin müvəqqəti işlər vəkili Derek Hoqan sosial şəbəkədə terrorçuluğa qarşı mübarizəyə dair müzakirələr aparır. Müzakirələr ABŞ və Azərbaycanın terrorçuluğa qarşı əməkdaşlığı, “İslam Dövləti” terror təşkilatına qarşı koalisiya və Azərbaycanın digər dövlətlərə terror və dini ekstremizmə qarşı mübarizə sahəsində nə öyrədə biləcəyi kimi mövzuları əhatə edir.
Trend.az
