Strasburqda Nizami Gəncəviyə həsr olunmuş elmi-ədəbi konfrans keçirilib

Posted by

Strasburqda Nizami Gəncəviyə həsr olunmuş elmi-ədəbi konfrans keçirilib

 

Strasburqda Nizami Gəncəviyə həsr olunmuş elmi-ədəbi konfrans keçirilib

Strasburqda Nizami Gəncəviyə həsr olunmuş elmi-ədəbi konfrans keçirilib

 

Bu gün Heydər Əliyev Fondu, Mədəniyyət və Turizm Nazirliyi, Azərbaycanın Fransadakı səfirliyi və Strasburq Milli və Universitet Kitabxanasının təşkilatçılığı ilə Strasburqun mərkəzi Reyn Mədəniyyət Sarayında Nizami Gəncəvinin həyatı, yaradıcılığı və əsərlərinə həsr edilmiş elmi-ədəbi konfrans keçirilib.

 

APA-nın Avropa müxbiri xəbər verir ki, konfransda Azərbaycanın Fransadakı səfiri Elçin Əmirbəyov, Azərbaycanın Avropa Şurası yanındakı Daimi Nümayəndəliyinin rəhbəri, səfir Emin Eyyubov, Azərbaycan Milli Elmlər Akademiyası Əlyazmalar İnstitutunun direktoru vəzifəsini icra edən Teymur Kərimli, Azərbaycan Yazıçılar Birliyinin Gəncə filialının sədri Məmməd Alim, Elzas regionunun mədəniyyət işləri üzrə sədri Alen Hos, Strasburq Milli və Universitet Kitabxanasının sədri Albert Puaro, kitabxananın milli irsinin qorunması üzrə məsul şəxs Frederik Blan, Prinseton Universitetinin Yaxın Şərq bilikləri departamentinin professoru Mişel Berri, Şərq Əlyazmaları İnstitutunun elmi rəhbəri Fransis Rixard, Berlin Humboldt universitetinin professoru Eva-Maria Auş, Neapol Şərqşünaslıq Universitetinin professoru Mikele Bernardini, Fransadan, Almaniyadan, İtaliyadan və Avropanın digər ölkə və universitetlərindən dəvət edilmiş professor, ədəbiyyatşünas, elm adamları iştirak ediblər.

 

Konfransda çıxış edən səfir E. Əmirbəyov 1991-ci ildə UNESCO-nun Nizami Gəncəvi ili elan etməsini vurğulayaraq, Nizami Gəncəvinin bütün Şərq və müsəlman dünyası intibahının ən parlaq simalarından olduğunu qeyd edib. Səfir Nizaminin əsərlərinin, onun humanist fikirlərinin dünya ədəbiyyatı, incəsənəti, dünya fəlsəfə düşüncəsinin, o cümlədən Avropa və Fransa ədəbiyyatının nüfuzlu nümayəndələrinin ilham mənbəyinə çevrildiyini söyləyib.

 

Daha sonra Nizami Gəncəvinin Strasburq Milli və Universitet Kitabxanasında saxlanılan “Xəmsə”sinin əlyazması, bu sənədin tarixi və saxlanılması haqda məlumatlar konfrans iştirakçılarına təqdim olunub.

 

Toplantıda iştirak edən müəllimlər və tələbələr panel üzvlərinə Nizami Gəncəvinin yaradıcılığına dair suallar ünvanlayıblar.

 

Konfransda iştirak edən fars köklü iranlılar Nizaminin nəyə görə türk deyil, yalnız fars dilində yazması, onun azərbaycanlı yoxsa fars olduğuna dair suallar ünvanlayıblar. Avropalı professorlar çıxışlarına və suallara cavablarında Nizaminin dövrünün tələblərini nəzərə almaqla fars dilində yazdığını, onun Azərbaycanda doğulub və yaşamış bir türk, Azərbaycan şairi olduğunu bildiriblər.

 

Bundan başqa, konfransın keçirildiyi Strasburq Reyn Mədəniyyət Sarayında Nizami Gəncəvinin yaradıcılığına dair müxtəlif şəkil, eksponatlardan ibarət sərgi təşkil olunub.

 

Ötən ilin noyabr ayının 19-dan açılmış sərgi fevralın 19-dək davam edəcək.

 

Sərginin keçirilməsində məsul şəxs olan, Strasburqda yaşayan azərbaycanlı xanım Elnarə Ramazanova sərgiyə Strasburq və Fransanın digər şəhərlərindən qrup şəkilində məktəblilərin səfərinin təşkil edildiyini, onlara Nizami Gəncəvi və Azərbaycan haqda məlumatlar verildiyini bildirib.

 

Artıq Strasburqun iki orta məktəbində şagirdlər Nizami Gəncəvi ilə bağlı tapşırıq işləri də yazıblar.

 

T. Kərimli tədbiri yüksək qiymətləndirərək, Strasburq Milli və Universitet Kitabxanası ilə bundan sonra da əməkdaşlıq edərək, bir neçə birgə elmi və ədəbi konfransların keçiriləcəyini söyləyib.

 

Apa.az