Ünvanlı dövlət sosial yardımı sisteminin avtomatlaşdırılması işləri normal qaydada davam etdirilir

Ünvanlı dövlət sosial yardımı sisteminin avtomatlaşdırılması işləri normal qaydada davam etdirilir

Ünvanlı dövlət sosial yardımı (ÜDSY) sisteminin elektron əsaslar üzərində avtomatlaşdırılması istiqamətində aparılan işlərin müzakirəsi məqsədilə Əmək və Əhalinin Sosial Müdafiəsi Nazirliyində (ƏƏSMN) iclas keçirilib.

 

Nazirliyin ictimaiyyətlə əlaqələr şəbəsindən AZƏRTAC-a bildiriblər ki, iclası giriş sözü ilə açan əmək və əhalinin sosial müdafiəsi naziri Səlim Müslümov dövlətimizin başçısının 23 fevral 2015-ci il tarixli Fərmanının icrası istqamətində nazirlik tərəfindən müvafiq Tədbirlər Planı əsasında və yaradılmış İşçi Qrup tərəfindən məqsədyönlü işlərin davam etdirildiyini vurğulayıb.

 

Qeyd olunub ki, işlər mərhələli şəkildə və vaxtlı-vaxtında, heç bir gecikmə olmadan yerinə yetirilir. Plana uyğun olaraq, görülmüş işlər nəticəsində ünvanlı dövlət sosial yardımının alınması üçün elektron formada müraciət (ərizə) forması, e-müraciətə baxılması üçün aidiyyəti qurumlarının informasiya resurslarından əldə ediləcək arayış və məlumatların siyahısı və s. artıq hazırdır.

 

S.Müslümov növbəti mərhələdə ÜDSY sisteminin avtomatlaşdırılması üçün lazımi texniki infrastrukturun ən vacib komponentləri olan proqram təminatları üzrə funksional tələblərin də hazırlandığını bildirib: ”Vətəndaşlara ÜDSY-nin alınması üçün elektron formada müraciət etmək imkanı yaradılması üçün “Elektron hökumət” portalında müvafiq proqram təminatı üzrə funksional tələblər hazırlanıb. Həmçinin ƏƏSMN-nin və nazirlik yanında Dövlət Sosial Təminat Xidmətinin aparatının analitik təhlillər aparması, rayon (şəhər) əhalinin sosial müdafiəsi mərkəzlərində işçilərin avtomatlaşdırılmış iş yerinin qurulması məqsədilə hazırlanacaq proqram təminatları üzrə də funksional tələblər müəyyən edilib.”

 

Nazir əlavə edib ki, ünvanlı yardımın alınması üçün müraciət etmiş ailələrin maddi-məişət şəraitinin müayinəsi və müayinənin nəticələrinin real vaxt rejimində Vahid Elektron Müraciət və Təyinat Alt Sisteminə (VEMTAS) ötürülməsi, habelə müraciətlərdəki məlumatların, müayinənin nəticələrinin və aidiyyəti qurumlardan elektron formada əldə edilən məlumatların təhlil olunması üçün də proqram təminatı yaradılacaq. Bütün bu proqram təminatları üzrə funksional tələblərin hazırlanması da təmin olunub. Bu funksional tələblər müzakirə şəraitində daha da təkmilləşdirilir. Nazirliyin kollegiyasında təsdiqləndikdən sonra bu proqram təminatlarının hazırlanması işlərinə başlanacaq. “Aparılan işlər onu deməyə əsas verir ki, biz Prezidentin ÜDSY sisteminin elektron əsaslar üzərində avtomatlaşdırılması ilə bağlı Fərmanında üzərimizə düşən vəzifələrin icrasını vaxtlı-vaxtında və keyfiyyətlə təmin edəcəyik. Bununla da innovativ texnologiyaların tətbiqi yolu ilə aztəminatlı ailələrin ünvanlı dövlət sosial yardım sistemi üzrə sürətli, rahat və şəffaf xidmətlərə çıxışının təmin edilməsi üçün şərait yaranacaq”,-deyə nazir bildirib.

 

S.Müslümov ÜDSY sisteminin avtomatlaşdırılması zamanı yeni elektron sistemdən vətəndaşların rahat istifadə etmələri üçün tapşırıqlar verib.

 

AzərTac.az