Magistraturaya qəbul imtahanının ikinci mərhələsində iştirak edəcək bakalavrların bəziləri yazılı imtahan verəcəklər

Tələbə Qəbulu üzrə Dövlət Komissiyası (TQDK) 2014-cü il mayın 25-də Bakı, Gəncə və Naxçıvan şəhərlərində 2014/2015-ci tədris ili üçün Azərbaycan Respublikası ali təhsil müəssisələrinin magistraturalarına qəbul imtahanının ikinci mərhələsini keçirəcəkdir.

Trend-in məlumatına görə, TQDK sədri Məleykə Abbaszadə bu gün keçirilən mətbuat konfransında bildirib ki, qəbul imtahanının birinci mərhələsinin nəticələrinə görə müsabiqə şərtlərini ödəyən bakalavrların proqram seçimi 2014-cü il mayın 1-dən 8-dək aparılıb. Onlar qeyd olunan müddət ərzində elektron ərizələrinə daxil olaraq bitirdikləri bakalavr ixtisasına uyğun qəbul proqramlarından birini seçib təsdiq ediblər.

M.Abbaszadənin sölzərinə görə, bu hüquqa malik olan bakalavrlardan 10159 nəfəri qəbul proqramını seçərək təsdiqləyiblər: “Onlardan 8900 nəfəri Azərbaycan bölməsi, 1259 nəfəri isə rus bölməsi üzrə imtahan verəcəkdir. Bakalavrların 4269 nəfərini oğlanlar, 5890 nəfərini isə qızlar təşkil edir. 6101 nəfər ali təhsil müəssisələrinin builki, 4058 nəfər əvvəlki illərin məzunudur. Bakalavrlardan 8957 nəfərinin Bakı şəhərində, 249 nəfərinin Naxçıvan şəhərində, 953 nəfərinin isə Gəncə şəhərində imtahan verəcəyi nəzərdə tutulur”.

TQDK sədri bildirib ki, imtahanın keçirilməsi üçün Bakı şəhərində 13, Naxçıvan şəhərində 1, Gəncə şəhərində isə 2 imtahan mərkəzi ayrılıb. İmtahanın idarə olunması üçün 70 imtahan rəhbəri, 733 nəzarətçi-müəllim ayrılıb. Bakalavrlara mayın 18-dən etibarən öz elektron ərizələrinə daxil olaraq “İmtahana buraxılış vərəqəsi”ni çap edib götürmək imkanı yaradılıb”.

İmtahan mayın 25-də saat 13:00-da başlanacaq və sualların cavablandırılmasına 1 saat 30 dəqiqə vaxt ayrılacaqdır.

TQDK sədri qeyd edib ki, ikinci mərhələdə bakalavrlara seçdikləri proqram üzrə 5-i açıq tipli olmaqla 50 test tapşırığı təqdim olunacaq. Bəzi proqramlar üzrə isə bakalavrlar yazılı imtahan verəcəklər. Hər düzgün cavab bir balla qiymətləndirilir, səhv cavablar düzgün cavabların nəticəsinə təsir göstərmir.

İmtahanın nəticələri www.tqdk.gov.az internet saytında yerləşdiriləcək.

Qəbul imtahanının ikinci mərhələsinin nəticələri elan olunduqdan sonra bakalavrlar 2014-cü il mayın 29-dan iyunun 1-dək ali təhsil müəssisələrinin magistraturalarına qəbul aparılan ixtisaslaşmaların müsabiqəsində iştirak etmək üçün internet vasitəsi ilə ixtisaslaşma seçimini yerinə yetirəcəklər.

Trend.az