Posted by 
Ölkəmizdə 51 min 600 nəfərdən çox şəxsə Prezident təqaüdləri təyin olunub
Prezidentinin müvafiq Fərman və Sərəncamlarına əsasən, Əmək və Əhalinin Sosial Müdafiəsi Nazirliyi (ƏƏSMN) tərəfindən Prezident təqaüdü təyin olunan vətəndaşların sayı hazırda 51 min 618 nəfər təşkil edir.
Nazirlikdən AzərTAc-a bildiriblər ki, son bir ildə ayrı-ayrı kateqoriyalardan olan vətəndaşlara təyin olunan Prezident təqaüdlərində mühüm artımlar edilməklə, həmin təqaüdlə təmin edilən vətəndaşların əhatə dairəsi daha da genişlənib. Belə ki, qeyd olunan dövrdə Azərbaycan Prezidentinin müvafiq Fərmanlarına əsasən, Prezident təqaüdünün orta aylıq məbləği müharibə əlilləri və onlara bərabər tutulan şəxslər üçün 50 faizə yaxın, Böyük Vətən müharibəsində iştirak etmiş bəzi kateqoriyalardan olan şəxslər üçün 81,8 faiz artırılıb. Habelə, İkinci Dünya müharibəsi dövründə Leninqrad şəhərinin mühasirəsi zamanı şəhərin müəssisələrində işləmiş, müvafiq medal və döş nişanı ilə təltif edilmiş şəxslərə və I qrup əlilliyə görə sosial müavinət alan vətəndaşlara da Azərbaycan Prezidentinin təqaüdünün təyin olunaraq ödənilməsinə başlanıb.
Ümumilikdə son bir ildə Prezident təqaüdü ilə təmin olunan vətəndaşların sayı 16 min 637 nəfər (47,5 faiz) artıb.
Cari ilin əvvəlindən isə dövlət başçısının 2014-cü il 11 avqust tarixli Fərmanı ilə Əfqanıstanda sovet qoşunlarının tərkibində beynəlmiləl borcunu yerinə yetirərkən həlak olan, itkin düşmüş və məhkəmə qaydasında ölmüş elan edilən hərbi qulluqçuların ailələrinə də aylıq 200 manat olmaqla Prezident təqaüdü təyin olunur.
AzərTac.az
