Posted by 
Çikaqo şəhərində keçirilmiş İpək Yolu Konfransında Azərbaycanın tranzit imkanları yüksək qiymətləndirilmişdir
ABŞ-ın aparıcı biznes mərkəzlərindən biri olan Çikaqo şəhərində Yeni İpək Yolu boyunca ölkələrin iqtisadiyyatı, onlar arasında ticarət və iqtisadi münasibətlər, ölkələrin biznes mühiti və tranzit imkanlarına həsr olunmuş 9-cu ənənəvi İpək Yolu Konfrası keçirilmişdir.
Trend Azərbaycan Respublikasının ABŞ-dakı Səfirliyinin Mətbuat Xidmətinə istinadən xəbər verir ki, tədbirdə Mərkəzi və Cənubi Asiya ölkələrinin, eləcə də Azərbaycan və Türkiyənin biznes və diplomatik dairələrinin, habelə ABŞ Dövlət Departamentinin və Müdafiə Daşımaları Agentliyinin (Defence Logistic Agency) nümayəndələri də iştirak etmişdilər. Azərbaycan tərəfindən tədbirdə Azərbaycanın ABŞ-dakı Səfirliyinin əməkdaşı Natiq Baxışov, Azərbaycanda İxracın və İnvestiyaların Təşviqi Fondunun (AZPROMO) ABŞ-dakı nümayəndəsi Elşən Baloğlanov, Naxçıvan Dövlət Universitetinin professoru Elbrus İsayev və azərbaycanlı iş adamı Bəsrəd Paşayev iştirak etmişdir.
ABŞ Dövlət Departamentinin regional məsələlərə məsul əməkdaşı Corc Təq və Müdafiə Daşımaları Agentliyinin nümayəndəsi polkovnik Emili Bakman çıxış edərək, indiyədək Əfqanıstandakı ABŞ və müttəfiq qoşunlarının təminatını həyata keçirən Şimal Təchizat Şəbəkəsinin (Northern Distribution Network) iqtisadi komponentlərinin artırılaraq onun gələcəkdə ölkələrin ticari və iqtisadi əlaqələrinin təşviq edilməsi üçün istifadə edilə biləcəyini vurğululamışdılar. Bunun üçün ölkələr arasında regional infrastrukturun yaradılması, habelə yükdaşımaların zaman və keyfiyyət baxımından daha da inkişaf etdirilməsi üçün ölkələr arasında gömrük prosedurlarının rahatlaşdırlması istiqamətində işlərin davam etdirilməli olduğu vurğulanmışdır. DD rəsmisi bu baxımdan Qazaxıstan, Azərbaycan, Gürcüstan və Türkiyənin gömrük prosedurlarının rahatlaşdırılmasını nəzərdə tutan “Silk Wind” layihəsini təqdir etmişdir. Daha sonra o, Bakı-Tbilisi-Qars dəmiryolu xətti və Ələt Beynəlxalq Dəniz Ticarət Limanı layihələrinin reallaşdırılmasının əhəmiyyətini vurğulamışdır.
Azərbaycan Səfirliyinin nümayəndəsi N.Baxışov çıxış edərək, Azərbaycanın müstəqilliyini əldə etdiyindən bəri keçdiyi iqtisadi inkişaf yolu, ölkənin bu sahədəki uğurları, habelə regional və beynəlxalq əhəmiyyətli enerji və nəqliyyat layihələri barədə danışmışdır. Azərbaycanın tarixən beynəlxalq enerji təhlükəsizliyi və təchizatında xüsusi rolunun olduğunu qeyd edən çıxışçı, Bakı-Tbilisi-Ceyhan və digər neft kəmərləri, eləcə də Avropa bazarlarına yeni həcmdə qaz nəqlini nəzərdə tutan Cənub Qaz Dəhlizi barədə məlumat vermişdir. Eyni zamanda, Azərbaycanın Şərq-Qərb və Şimal-Cənub nəqliyyat dəhlizlərindəki rolu barədə danışılmışdır.
Azərbaycan Səfirliyinin əməkdaşı N.Baxışov və Müdafiə Daşımaları Agentliyinin nümayəndəsi E.Bakman çıxışları zamanı “SilkWay Airlines”-ın Əfqanıstana daşımalarda oynadığı rolu vurğulamışdılar.
AZPROMO-nun ABŞ-dakı nümayəndəsi E.Baloğlanov öz çıxışında Azərbaycanın qeyri-neft məhsullarının, xüsusilə qida, meyvə şirəsi və spirtli içkilərinin ixrac qabiliyyətindən və bu sahədə AZPROMO vasitəsilə Azərbaycan hökuməti tərəfindən ABŞ idxalçı və distribyutorlarına təklif olunan güzəştlərdən istifadə etməyə çağırmışdır. Eyni zamanda, o, Azərbaycanda investisiya mühiti, turizm və informasiya texnologiyaları sahəsində aparılan işlər barədə məlumat vermiş, həmçinin xarici investorlar üçün Sumqayıt Kimya Sənaye Parkı və Yüksək Texnologiyalar Parkının imkanlarından istifadə etməyə dəvət etmişdir.
Naxçıvan Dövlət Universitetinin professoru E.İsayev İpək Yolunun qədim və müasir tarixlərindən məlumat vermiş, Naxçıvanın bu yolda oynadığı əhəmiyyətli roldan danışmışdır.
Çikaqo şəhərinə səfər çərçivəsində Azərbaycan Səfirliyinin əməkdaşı və AZPROMO nümayəndəsinin Şimali İllinoys Universitetinin rəhbərliyi ilə görüşü baş tutmuşdur. Görüş zamanı Azərbaycanın təhsil müəssisələri, o cümlədən ADA Universiteti və Bakı Ali Neft Məktəbi barədə məlumatlar verilmişdir.
Qeyd edək ki, Çikaqoda fəaliyyət göstərən Mərkəzi Asiya Araşdırmalar Mərkəzinin (Central Asia Productivity Research Center, CAPRC) təşkilatçılığı keçirilmiş İpək Yolu Konfransı “SilkWay Airlines” və AZPROMO-nun əsas maliyyə dəstəyi ilə baş tutmuşdur.
Trend.az
