Posted by 
Bakının əsas prospektində avtomobillərin hərəkətinə məhdudiyyətlər qoyuldu
Bu gün Bakının əsas prospekti sayılan Heydər Əliyev prospektində avtomobillərin hərəkəti məhdudlaşdırılıb. Bu barədə Trend-in sorğusuna cavab olaraq Daxili İşlər Nazirliyi Bakı Şəhər Baş Polis İdarəsi Dövlət Yol Polisi İdarəsinin İctimai qurumlarla əlaqə bölməsinin rəisi, polis polkovnik-leytenantı Vaqif Əsədov bildirib.
V.Əsədov deyib ki, əlavə informasiya löhvələri quraşdırıldığından, avtomobillərin prospektin əsas yolundan istifadə etməsinə məhdudiyyətlər tətbiq edilir.
Bakı yol polisi sürücülərdən xahiş edir ki, metronun “Koroğlu” stansiyasından və “Excelsior” hotelindən hər iki istiqamətə hərəkət edərkən köməkçi yollardan istifadə etsinlər.
V.Əsədov prospektin əsas yolunun qısa zamanda açılacağını deyib.
Bölmə rəisi həmçinin bildirib ki, Bakıda İçərişəhər – Qoşa Qala Qapısı meydanında Novruz şənliklərinin keçirilməsi ilə əlaqədar olaraq sürücülər imkan daxilində həmin istiqamətə şəxsi maşınlarından istifadə etməsinlər.
Trend.az
