Posted by 
Azay Quliyev: “Vaxtında Azərbaycanı müdafiə etsəydiniz, Ukraynadakı hadisələr də olmazdı”
ATƏT PA-nın Kopenhagendə keçirilən Büro iclasında Ukraynadakı böhran, komitələrin qurumun Bakıda keçiriləcək 23-cü illik sessiyasına təqdim etmək üçün hazırladıqları hesabat və qətnamələrin müzakirəsi, ATƏT-ə sədrlik edən İsveçrənin hazırladığı fəaliyyət planı geniş müzakirə edilib.
APA-nın xəbərinə görə, ATƏT PA-nın Büro üzvü və Təhlükəsizlik və Siyasi məsələlər Komitəsinin sədr müavini, Azərbaycanın millət vəkili Azay Quliyev iclasda çıxış edib.
Ukraynadakı vəziyyətə toxunan millət vəkili bu ölkənin ərazi bütövlüyünü və beynəlxalq səviyyədə tanınmış sərhədlərinin toxunulmazlığını müdafiə edib. O vurğulayıb ki, bugünkü böhranlı vəziyyətin yaranmasında beynəlxalq təşkilatlar da az məsuliyyət daşımırlar: “Belə ki, ATƏT və digər beynəlxalq qurumlar regionda mövcud olan dövlətlərarası münaqişələri, xüsusilə Ermənistan-Azərbaycan münaqişəsinin vaxtında və ədalətli həllinə nail olsaydı və qəti qərarlar qəbul edərək ölkəmizin ərazi bütövlüyünü təmin etsəydi, indiki vəziyyətin şahidi olmazdıq. İndi çoxu beynəlxalq hüququn kobud şəkildə pozulmasından danışır, amma təəssüf ki, biz 20 ildən çoxdur bu haqda danışsaq da, buna məhəl qoyan yoxdur. Yaranmış gərgin vəziyyət ATƏT üçün bir imtahandır və bunun öhdəsindən gəlmək üçün yol xəritəsi hazırlanmalı və cəsarətli qərarlar qəbul edilməlidir”.
Daha sonra Azay Quliyev ATƏT PA Təhlükəsizlik və Siyasi məsələlər Komitəsinin məruzəçisi xanım Pia Kaumanın hazırladığı qətnamə layihəsinə iki mühüm məsələnin əlavə edilməsini təklif edib: “Birincisi, bir dövlətin başqa birisinin ərazisini işğal etmək məqsədilə xalqların öz müqəddəratını təyin etmək adı altında qondarma referendumlar keçirməsinə və işğala qanuni don geyindirmək cəhdlərinə ATƏT PA münasibət bildirməlidir. ATƏT ərazisində mövcud olan münaqişələrin tarixinə baxsaq, görərik ki, bütün bu münaqişələrin hamısı saxta referendum keçirməklə başlayıb. Bunun qarşısını almaq üçün ATƏT açıq şəkildə bildirməlidir ki, bu tipli referendumlar üzv ölkələrin konstitusiya və qanunları çərçivəsində olmalı, birtərəfli şəkildə elan olunan separatçı fəaliyyətə yol verilməməlidir”.
İkinci təklifdə isə ATƏT-in bir üzvünün digərinin ərazi bütövlüyünə və suverenliyinə hörmət etməsi və bunun qətnamədə ayrıca bir maddə ilə qeyd olunmasının vacibliyi vurğulanıb. İsveçrənin sədrliyinə də toxunan A.Quliyev mövcud problemlərin həlli üçün vətəndaş cəmiyyəti institutları ilə yaxından əməkdaşlıq edilməsini və bu prosesdə ölkə parlamentlərinin rolunun artırılmasının zəruriliyini qeyd edib.
Apa.az
