Posted by 
Ədliyyə Nazirliyi notariat fəaliyyəti ilə məşğul olmaq istəyənlər üçün sənəd qəbulu elan edib
Əhaliyə göstərilən hüquqi xidmətin keyfiyyətinin yüksəldilməsi, bu sahədə fəaliyyətin müasirləşdirilməsi məqsədilə ölkəmizdə son illərdə kompleks tədbirlər görülüb, notariat fəaliyyəti ilə məşğul olmaq üçün şəhadətnamə almaq istəyən şəxslərlə Ədliyyə Nazirliyinin İxtisas Komissiyası tərəfindən şəffaf prosedurlarla test imtahanı və müsahibələr keçirilərək yeni notariuslar korpusu formalaşdırılır.
Hazırda Şirvan şəhərində, Ağsu, Qobustan, Şəmkir, Yardımlı və Zərdab rayonlarında notarius vakansiyalarının yaranması ilə əlaqədar notariat fəaliyyəti ilə peşəkarcasına məşğul olmaq üçün şəhadətnamə almaq istəyən “Notariat haqqında” Qanunun tələblərinə cavab verən ali hüquq təhsilli Azərbaycan Respublikası vətəndaşları test imtahanında iştirak etmək üçün sənədlərini 2015-ci ilin sentyabrın 1-dən etibarən Ədliyyə Nazirliyinin Qeydiyyat və notariat baş idarəsinə (Bakı şəhəri, Azadlıq prospekti, 72) bütün iş günlərində təqdim edə bilərlər.
Ədliyyə Nazirliyinin mətbuat xidmətindən AZƏRTAC-a bildiriblər ki, “Notariat haqqında” Qanunun və “Notariat fəaliyyəti ilə məşğul olmaq məqsədi ilə şəhadətnamə almaq üçün imtahanın və müsahibələrin keçirilməsi Qaydası”nın tələblərinə uyğun olaraq test imtahanından uğur qazanmış namizədlər növbəti mərhələyə – müsahibəyə buraxılırlar. Мüsahibəni müvəffəqiyyətlə başa vuranlar isə Ədliyyə Akademiyasında icbari təlimə cəlb olunurlar. Bu zaman onlar, həmçinin notariat fəaliyyəti üzrə təcrübə də keçirlər. İcbari təlimin yekununda aparılan qiymətləndirmənin nəticəsi üzrə notariat fəaliyyəti ilə məşğul olmaq üçün şəhadətnamə verilir.
Tələb olunan sənədlərin siyahısı, imtahan, müsahibə və icbari təlimin keçirilməsi qaydaları ilə nazirliyin internet saytında (www.justice.gov.az) tanış olmaq, habelə 404-42-19, 404-42-28 nömrəli əlaqə telefonları vasitəsilə məlumat almaq mümkündür.
Test imtahanının vaxtı və yeri barədə əlavə məlumat veriləcək.
AZƏRTAC
